देशका विभिन्न स्थानमा भएको सवारी दर्घटनामा तीन जनाको मृत्यु भएको छ । काठमाडौं महानगरपालिका-१५ स्वयम्भू मुस्ताङ गुम्बा नजिक सडकमा बा.२ ख ५३२४ नम्बरको बसको ठक्करबाट पैदलयात्री मनाङ घर भई काठमाडौं महानगरपालिका- १५ स्वतन्त्र मार्ग बस्ने ७६ वर्षीय छिमी दोर्जे गुरूङको मंगलबार दिउँसो मृत्यु भएको छ ।

ठक्करबाट गम्भीर घाइते भएका उनको मनमोहन अस्पताल स्वयम्भूमा उपचारको क्रममा मृत्यु भएको हो । हाल फरार बस चालकको प्रहरीले खोजी गरिरहेको छ । त्यस्तै कञ्चनपुर, पुनर्वास नगरपालिका-४ कार्गिलडाँडास्थित सडकमा सोही नगरपालिका- ४ घ गाँउ बस्ने ५० वर्षीय झर सिंह ठकुरीको साइकलबाट लडेर मंगलबार साँझ घटनास्थलमै मृत्यु भएको छ ।

यता भक्तपुर, भक्तपुर नगरपालिका-६ डेकोचास्थित सडकमा बा.३ ख ५०८० नम्बरको बसको ठक्करबाट पैदलयात्री हाल नाम, थर, वतन नखुलेका करिब ४० वर्षीय पुरूषको मंगलबार राति मृत्यु भएको छ ।

ठक्करबाट गम्भीर घाइते भएका उनको भक्तपुर अस्पतालमा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।