देशका विभिन्न स्थानबाट मृत अवस्थामा पाँच जना फेला परेका छन् । कैलाली, गोदावरी नगरपालिका-३ चौकिडाँडास्थित महिला सामुदायिक वनमा गोदावरी नगरपालिका-११ लिउसन बस्ने ७९ वर्षीया नरी कामी बुधबार मृत अवस्थामा फेला परेकी छिन् ।

त्यस्तै प्युठान, झिमरूक गाउँपालिका-३ कोटफेरा बस्ने ७३ वर्षीया हिरा सार्की सोही ठाउँस्थित कोठेभिर भन्ने स्थानमा बुधबार मृत अवस्थामा फेला परेकी छिन् । गत साउन १५ गतेदेखि घरबाट हिँडेकी उनको इलाका प्रहरी कार्यालय ओखरकोटबाट खटिएको प्रहरीले आफन्तको सहयोगमा खोजी गर्ने क्रममा शव फेला परेको हो ।

यस्तै बाँके, जानकी गाउँपालिका-४ किरणनाला खोलामा सोही गाउँपालिका-४ गौरीनगर बस्ने ५७ वर्षीय स्ववर्ण सिंह थापा बुधबार मृत अवस्थामा फेला परेका छन् । उता धनुषा, जनकपुर उपमहानगरपालिका-३ बेला बस्ने मोहमद मुसलीम लहेरीकी छोरी ८ वर्षीया सबना खातुन सोही ठाउँस्थित पानी जमेको खाल्डोमा बुधबार मृत अवस्थामा फेला परेकी छिन् ।

यता सिन्धुली, गोलन्जोर गाउँपालिका-७ सुनकोशी नदी किनारमा हाल नाम, थर, वतन नखुलेका अन्दाजी ४१ वर्षीय पुरूष बुधबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।