देशका विभिन्न स्थानबाट जुवातास खेलिरहेको अवस्थामा ११ जना पक्राउ परेका छन् । बैतडी, पाटन नगरपालिका-४ मोहनपुरस्थित अन्नपुर्ण होटेलमा जुवातास खेलिरहेको अवस्थामा होटल संचालक सोही ठाउँ बस्ने ४२ वर्षीय गणेश सिंह बिष्ट समेत पाँच जनालाई बिहीबार साँझ प्रहरीले पक्राउ गरेको छ ।

इलाका प्रहरी कार्यालय पाटनबाट खटिएको प्रहरीले उनीहरूलाई नगद ६२ हजार ७ सय ७० रूपैयाँ र १ बुक तास सहित पक्राउ गरेको हो । त्यस्तै डडेल्धुरा,अमरगढी नगरपालिका-५ तुफानडाँडा बस्ने खडक बहादुर देउवाको घरमा जुवातास खेलिरहेको अवस्थामा खडक बहादुर समेत छ जनालाई बिहीबार दिउँसो प्रहरीले पक्राउ गरेको छ ।

जिल्ला प्रहरी कार्यालय डडेल्धुराबाट खटिएको प्रहरीले उनीहरूलाई नगद १२ हजार ३ सय ५५ रूपैयाँ र १ सय ६० पत्ती तास सहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।