अमेरिकाको टेक्सास राज्यको ह्युष्टनमा आफ्नै अपार्टमेन्टमा गोली लागी मृत्यु भएकी २१ वर्षकी नेपाली विद्यार्थी मुना पाण्डेको हत्या अभियोगमा एक व्यक्ति पक्राउ परेका छन् ।

पक्राउ पर्नेमा ५१ वर्षीय बवीसिं शाह रहेका छन् । शाह टेक्सास राज्यबाट पक्राउ परेका हुन् । परिवारमा एकमात्र सन्तान मिनाको शनिबारदेखि नै फोन अफ रहेकाले घटना शनिबार नै भएको हुनसक्ने आशंका गरिएको छ । हयुष्टन पुलिस डिपार्टमेन्टले ६३६३ वेष्ट एयरपोर्ट ब्लुवर्डमा गत सोमबार साँझ ५ः३५ बजे पाण्डेको शव उनकै अपार्टमेन्टमा फेला पारेको थियो ।

तीन वर्षअघि अमेरिका पुगेकी मुनाको शव भदौ ११ गते मंगलबार उनी बस्ने अपार्टमेन्टमा भेटिएको थियो । मुनाको छातीमा तीन वटा गोली लागेको छ । प्रहरीलाई अपार्टमेन्टको स्टाफले फोन गरेर जानकारी दिएको र सोही जानकारीका आधारमा अपार्टमेन्टमा प्रहरी टोली सोमबार पुगेका जनाइएको छ ।

प्रहरीले बुधबार दिउसो संदिग्धको फोटो सार्वजनिक गरेको केही घण्टापछि शाहलाई पक्राउ गरेको हो । सीटीटिभी फुटेजबाट लिइएको फोटो अगस्त २४ शनिबार राती ९ बजेर ४८ मिनेटको थियो ।