धनुषा, क्षिरेश्वरनाथ नगरपालिका-७ क्षिरेश्वरनाथ महादेव मन्दिरस्थित सडकमा महेन्द्रनगरबाट ईच्छापुरतर्फ जाँदै गरेको हाल नम्बर नखुलेको मोटरसाइकलको ठक्करबाट सोही ठाउँ बस्ने स्विटा यादवकी छोरी ७ वर्षीया रचना यादवको मंगलबार बिहान मृत्यु भएको छ ।

ठक्करबाट गम्भीर घाइते भएकी उनको प्रादेशिक अस्पताल जनकपुरमा उपचारको क्रममा मृत्यु भएको हो । प्रहरीले हाल फरार मोटरसाइकल चालकको खोजी गर्नुको साथै दुर्घटनाका सम्बन्धमा आवश्यक अनुसन्धान गरिरहेको छ ।

मोटरसाइकल दुर्घटनामा एक जनाको मृत्यु
त्यस्तै नवलपरासी पश्चिम, सरावल गाउँपालिका-१ बसही चोकस्थित सडकमा बासाबाट नयाँगाउँतर्फ जाँदै गरेको लु.४४ प ३३६८ नम्बरको मोटरसाइकलबाट खसेर सोही गाउँपालिका-१ नयाँटोल बस्ने ५२ वर्षीया शिला गौडेलको सोमबार राति मृत्यु भएको छ ।

मोटरसाइकलबाट खसेर गम्भीर घाइते भएकी उनको लुम्बिनी सिटी अस्पताल बुटवलमा उपचारको क्रममा मृत्यु भएको हो । प्रहरीले मोटरसाइकल चालकलाई नियन्त्रणमा लिई दुर्घटनाका सम्बन्धमा आवश्यक अनुसन्धान गरिरहेको छ ।