नवकान्तिपुर संवाददाता
काठमाडौं, ११ साउन।
सुनसरीको देवानगञ्ज गाउँपालिका-३, कप्तानगन्जमा दुई समूहबीच भएको हिंसात्मक झडप नियन्त्रणमा लिने क्रममा प्रहरीको गोली लागि एक जनाको मृत्यु भएपछि सुनसरी जिल्ला प्रशासन कार्यालयले कर्फ्यु तथा निषेधाज्ञा आदेश जारी गरेको छ ।
सुनसरी जिल्ला प्रशासन कार्यालयले आज बिहान ७ः०० बजेदेखि विभिन्न क्षेत्रमा कर्फ्यू आदेश जारी गरेको छ । कार्यालयले स्थानीय प्रशासन ऐन, २०२८ को दफा ६ (क) बमोजिम अर्को सूचना जारी नभएसम्मका लागि कर्फ्यू आदेश जारी गरेको हो ।
कार्यालयले चार किल्ला तोकी उक्त सीमानाभित्र कसैले पनि आवतजावत गर्न, कुनै पनि प्रकारको भेला, जुलुस, प्रदर्शन, सभा, बैठक तथा घेराउ गर्न नपाउने गरी अनिश्चितकालीन कर्फ्यू आदेश जारी गरेको छ । उक्त आदेश उल्लङ्घन भएमा रु एक हजार जरिवाना वा एक महिनासम्म कैद हुनसक्ने प्रशासनले जनाएको छ ।
कार्यालयले इलाका (क) अन्तर्गत भण्टाबारी बजार क्षेत्रमा पूर्वतर्फ जुनिया टोल, पश्चिमतर्फ पश्चिम घुस्की धार, उत्तरतर्फ हरिनगर गाउँपालिका कार्यालय र दक्षिणतर्फ वसन्तपुर मोडसम्म कर्फ्यू आदेश जारी गरेको छ ।
साथै इलाका (ख) घुस्की बजार क्षेत्रमा पूर्वतर्फ मोरङ्गा धार खोला, पश्चिमतर्फ इङ्गिलस फिल्ड, उत्तरतर्फ सुनसरी खोला र दक्षिणतर्फ हरिनगर गाउँपालिका कार्यालय तथा इलाका (ग) कप्तानगञ्ज बजार क्षेत्रअन्तर्गत पूर्वतर्फ यादव टोल, पश्चिमतर्फ पाँचौँ रिसाल मावि, उत्तरतर्फ कृष्ण मावि र दक्षिणतर्फ नेपाल–भारत सीमा क्षेत्रमा कर्फ्यू आदेश जारी गरेको छ ।
कार्यालयका अनुसार इलाका (घ) बस्ती बजार क्षेत्रअन्तर्गत पूर्वतर्फ कासिमिया मदरसा, पश्चिमतर्फ प्रहरी चौकी घुस्की, उत्तरतर्फ इशा हार्डवेयर, दक्षिणतर्फ दिलशाद पब्लिक स्कुल तथा इलाका (ङ) (देवानगञ्ज बजार क्षेत्रअन्तर्गत पूर्वतर्फ विराटनगर जाने बाटोको मुसहर टोल, पश्चिमतर्फ मोरिया खोला, उत्तरतर्फ बिड्रा मिल र दक्षिणततर्फ गापा कार्यालयसम्म कर्फ्यू आदेश जारी गरेको छ ।
निषेधाज्ञा जारी
सुनसरी जिल्ला सुरक्षा समितिको आजको बैठकले जिल्लाका विभिन्न स्थानमा निषेधाज्ञा आदेश जारी गरेको छ । कार्यालयले हरिनगर गाउँपालिकाको सम्पूर्ण क्षेत्र र देवानगञ्ज गाउँपालिकाको सम्पूर्ण क्षेत्रमा उक्त आदेश जारी गरेको हो ।
स्थानीय प्रशासन ऐन, २०२८ को दफा ६ को उपदफा ३ (क) बमोजिम आज बिहान ७ः०० बजेदेखि साँझ १९ः०० बजेसम्म एकै ठाउँमा पाँच जनाभन्दा बढी मानिस भेला जम्मा हुन नपाउने गरी निषेधाज्ञा आदेश जारी गरिएको कार्यालयले जनाएको छ ।
कसैले उक्त आदेशको उल्लङ्घन गरेमा सोही उपदफा बमोजिम रु पाँच हजारसम्म जरिवाना र एक महिनासम्म कैद हुनसक्ने कार्यालयको भनाइ छ ।
