हुम्लाको कर्णाली नदीमा मंगलबार दिउँसो यात्रुबाहक जिप खस्दा सबै यात्रु बेपत्ता भएका छन् । खार्पुनाथा गाउँपालिका-५ बाट याक्चुकुना जाँदै गरेको लु १ ज ७१६६ नम्बरको जिप नदीमा खसेको प्रहरी निरीक्षक राजेन्द्रबहादुर सिंहले जानकारी दिए ।

उद्दारका लागि सुरक्षाकर्मी र स्थानीय पुगे पनि नदीमा खसेको जिप फेला नपरेको प्रहरीले जनाएको छ । प्रहरी निरीक्षक सिंहका अनुसार जिप नदीले बगाएको सम्भावना छ । उनले जीप फेला नपरेकाले यात्रु संख्या कति रहेको भन्ने यकिन नभएको बताए । स्थानीयका अनुसार भने जीपमा १० भन्दा बढी यात्रु सवार थिए ।

उद्धारका तथा खोजीका लागि जिल्ला प्रहरी कार्यालयको टोली पनि हेलिकोप्टरबाट घटनास्थल पठाइएको सिंहले बताए ।