राष्ट्रिय खेलकूद परिषद्का सदस्यसचिव रमेशकुमार सिलवालले १३औँ दक्षिण एशियाली खेलकूद (साग) निर्धारित मितिमै आयोजना गरिने बताएका छन्। खेलकूद पत्रकार मञ्च गण्डकीले शनिबार पोखरामा आयोजना गरेको पत्रकार भेटघाटमा उनले साग र नवौँ राष्ट्रिय खेलकूद तोकिएको मितिमा सम्पन्न गर्न चुनौती रहे पनि त्यसको सामना गरेर सोही मितिमा गरिने स्पष्ट पारे ।
यही वर्षको डिसेम्बर १ देखि ९ सम्म नेपालमा तय भएको साग खेलकूदलाई सम्पन्न गर्न भौतिक पूर्वाधार निर्माण र खेलाडीको तयारी चुनौतीको रूपमा रहेको बताउँदै उनले भने, ‘जे कामका निम्ति आएको हुँ, त्यो गर्न नसके म मेरो पदमा बस्नुको कुनै अर्थ हुँदैन, चुनौती र जिम्मेवारीलाई समन्वय गरेर अघि बढ्छु ।’ सिलवालले नेपाल क्रिकेट सङ्घ (क्यान)को विवाद समाधान गर्नका लागि पाँच सदस्यीय कमिटी रहेको बताउँदै एक हप्ताभित्रमा समाधानको पहल गरिने स्पष्ट पारे ।
उाले पोखरा रङ्गशालाभित्र निर्माण भइरहेको अन्तर्राष्ट्रिय फुटबल रङ्गशालाको मैदान प्राकृतिक घाँसे नै बन्नुपर्ने बताउँदै प्राकृतिक शहरमा कृत्रिम मैदान हुन नहुनेमा जोड दिए । रङ्गशाला निर्माणमा आर्थिक अभाव हुन नदिने प्रतिबद्धता व्यक्त गर्दै सिलवालले गुणस्तरीय हिसाबले साग खेलकूद अघि निर्माण सम्पन्न गरिनुपर्ने बताए ।
