२६ साउन, काठमाडौं । मनसुनी वर्षापछि आएको बाढी, पहिरो र डुबानका कारण भारतमा तीन दिनको अवधिमा कम्तीमा १०० जनाको मृत्यु भएको छ भने लाखौँ नागरिक विस्थापित भएका छन् ।
बाढीले भारतको दक्षिणी राज्य केरला सबैभन्दा बढी प्रभावित भएको छ । यहाँ बिहीबारदेखि शनिबारसम्ममा मात्रै ४८ व्यक्तिले ज्यान गुमाएका छन् ।
केरलाको छिमेकी कर्नाटक राज्य पनि वर्षा र बाढीको चपेटामा परेको छ । भारतीय सञ्चारमाध्यमहरुले जनाएअनुसार, यहाँका करिब २४ जनाले बाढी र पहिरोमा परी ज्यान गुमाएका छन् भने नौ जना हराइरहेका छन् ।
भारतको पश्चिमी राज्य महाराष्ट्र र गुजरात पनि वार्षिक मनसुनी आँधीका कारण नराम्रोसँग प्रभावित बनेका छन् । कर्नाटकमा विभिन्न ६०० राहत केन्द्रमा करिब एक लाख ६१ हजार मानिस विस्थापित भएर आश्रय लिइरहेका छन् ।
भारतीय सञ्चारमाध्यमहरूले जनाएअनुसार महाराष्ट्रमा पनि २७ जनाले वर्षा, बाढी र डुवानका कारण ज्यान गुमाएका छन् । यस्तै गुजरातका अहमेदावाद र नादिआवादमा पनि वर्षाजन्य घटनाका कारण आठ जनाको मृत्यु भएको छ ।
सबैभन्दा बढी प्रभावित केरला राज्यमा करिब एक लाख २० हजार व्यक्ति बिस्थापित भएका छन् । उनीहरुले अहिले आपतकालीन राहत केन्द्रमा आश्रय लिइरहेका छन् । भारतीय सञ्चारमाध्यमहरुले जनाएअनुसार केरलाका करिब ८० स्थानमा वर्षापछि बाढी र पहिरो गए पनि प्रहरी पुग्न सकेको छैन ।
केरलामा शनिबारपछि पनि वर्षा जारी रहने र यहाँको जनजीवन थप प्रभावित हुने अनुमान गरिएको छ ।
ग्रामीण वस्तीहरूमा सैनिकका विभिन्न समूहहरूलाई उद्धार इकाइ बनाई उद्धारमा लाग्न र विस्थापित नागरिकलाई खाद्यान्न तथा अत्यावश्यक सामग्री वितरण गर्न आवश्यक हेलिकोप्टरहरूको पनि परिचालन गर्न सरकारले निर्देशन दिएको छ ।
बाढी र पहिरोका कारण धेरै नागरिक प्रभावित भएपछि प्रधानमन्त्री नरेन्द्र मोदीले उक्त क्षेत्रमा राहत तथा उद्धारको कमी हुन नदिन सरकारी अधिकारीहरूलाई निर्देशन दिएका छन् ।
केरला बाढी पहिरोको जोखिममा रहेको क्षेत्र हो । यहाँ गत वर्ष बाढी आउँदा कम्तीमा ५ सयको ज्यान गएको थियो ।
