रियालिटी शो ‘नेपाल लोक स्टार’को ग्रान्ड फाइनल यही कात्तिक ८ गते हुने भएको छ । काठमाडौंको प्रदर्शनीमार्गस्थित भृकुटीमार्गमा ग्रान्ड फाइनल हुनेछ ।
साँझ ५ बजेबाट ८ बजेम्म फाइनल चल्नेछ । उक्त ग्रान्ड फाइनलबाट पहिलो नेपाल लोक स्टार घोषणा गरिने आयोजकले जनाएको छ ।
‘नेपाल लोक स्टार’मा चार जना प्रतिस्पर्धी फाइनल पुगेका छन् । रामकुमार नेपाली, शनी विश्वकर्मा, विनोद दनुवार र चेतन गोतामे फाइनलमा पुगेका छन् । ३२ औं श्रृंखलाबाट चार उत्कृष्ट फाइनमा पुगेका छन् ।
‘नेपाल लोक स्टार’का अनुसार गत शनिबार दिउँसो १२ बजेबाट कात्तिक ८ गतेसम्म चार प्रतिस्पर्धीलाई स्रोता तथा दर्शकले भोट गर्न पाउने छन् । प्राप्त भोटका आधारमा विजेता घोषित हुने छन् ।
उत्कृष्ट २० देखि ८० प्रतिशत भोटिङ र २० प्रतिशत निर्णायकको नम्बरका आधारमा ‘शो’मा प्रतिस्पर्धीको निर्णय हुँदै आएको थियो ।
‘नेपाल लोक स्टार’मा जयनन्द लामा, बिबी अनुरागी, रामजी खाँड र सुनिता दुलाल निर्णायक छन् ।
विजेताले करसहित नगद ५० लाख रुपैयाँ पाउने छन् । आयोजकका अनुसार दोस्रो हुनेलाई २५ लाख (करसहित) र तेस्रो हुनेलाई १० लाख रुपैयाँ (करसहित) पुरस्कार प्रदान गरिने छ ।
