आफैले नियम कानुन ऐन निर्माण गर्ने अधिकार भएपनि स्थानीय सरकारका प्रमुखहरुले आफुहरुलाई हिजोको गाविस अध्यक्ष कै भुमिकामा राख्दा स्थानीय सरकारले गति लिन नसकेको प्रदेश ३ का मुख्य मन्त्री डोरमणी पौडेलले बताएका छन् ।
‘सबै अधिकार उहाँहरुसँगै छ तर पनि सोचमा परिवर्तन नआउँदा स्थानीय सरकारले राम्रो सँग काम गर्न सकेन,अब काम गर्ने शैलिमा परिवर्तन गर्नुपर्छ’, पौडेलले भने ।
प्रदेश ३ को मुख्यमन्त्री भएपछि तेस्रो पटक सिन्धुपाल्चोकमा आएका मुख्य मन्त्री पौडेलले सुनकोशी गाउँपालिका ७ पाँग्रेटारमा भुकम्पपछि पुननिर्माण सम्पन्न भएको सेतीदेवी माध्यमिक विद्यालयको भवन उद्घाटन तथा हस्तान्तरण कार्यक्रममा यस्तो बताएका हुन् ।
स्थानीय सरकारले अहिले पनि केन्द्र र प्रदेशसँग पैसा मागेर वडा तहमा भागबण्डा मात्रै गरिरहेका छन् पौडेलले भने स्थानीय सरकारले आफुहरुलाई हिजोको गाविस अध्यक्ष भन्दा माथी राखेर सोच्नु पर्छ ।
तिनै तहको सरकारको लामो यात्रा भएकाले विकासका मोडलमा पनि पर्वितन गर्नु पर्ने पौडेलको भनाई छ । विकासको सुरुवात गर्दा आवश्यकताको पहिचान गरौ,विकास गर्दा विनाशको परम्परालाई अन्त्य गरौ, विकासलाई उत्पादन र रोजगारी सँग जोडौ,त्यसो भयो भने समृद्धिको लक्ष्य पुरा हुन्छ ।
भौतिक निर्माण मात्रै विकास हो भन्ने परम्परागत सोच भन्दा माथी उठेर काम गर्नका लागि मुख्य मन्त्री पौडेलले जनप्रतिनिधिहरुलाई आग्रह गरे । प्रदेश सरकारले छोटो समयमा नै धेरै काम गरेको दाबी गर्दे मुख्य मन्त्री पौडेलले भने हामी जहाँ हात हाल्छौ,त्यो काम सम्पन्न गरेरै छाडछौ ।
