प्रधानमन्त्री केपी शर्मा ओलीले मन्त्रिमण्डल परिवर्तनको क्रममा श्रम रोजगार तथा सामाजिक सुरक्षामन्त्री गोकर्ण विष्टलाई हटाएपछि वैदेशिक रोजगारसँग सम्बन्धित केहीले भने भोज नै गरिरहेका छन् । वैदेशिक रोजगारदाताहरूले प्रधानमन्त्री ओलीलाई प्रभावमा पारेर राम्रो काम गरिरहेका विष्टलाई हटाईएको स्रोतको दावी छ ।
लामो समयदेखि भ्रष्टाचार र लुटतन्त्रको अखडा बनेको वैदेशिक रोजगारीको क्षेत्रमा विष्टले धेरै सुधार गरेको र केही काम प्रक्रियामै रहेकाले उनलाई हटाउन नाम चलेकै मानव तस्करहरुसमेत लागिपरेका थिए ।
मलेसिया सरकारसँग लिएको अडान, जापानमा नेपाली कामदार पठाउन गरिएको पहल, केही खाडी मुलुकसँग गरिएको फ्री भिसा र फ्री टिकट सम्झौता, वैदेशिक रोजगार विभागमा गरिएका सुधारका काम, म्यानपावर कम्पनीहरूलाई जबाफदेही बनाउन चालिएको कदम, आफ्नै प्रदेशबाट श्रम गर्न मिल्ने व्यवस्था, प्रधानमन्त्री रोजगार कार्यक्रम र सामाजिक सुरक्षा जस्ता कामले परिणाम देखाएका मन्त्री विष्ट विभिन्न क्षेत्रका माफियाहरूको नजरमा कसिंगर बनेका थिए
।
मन्त्री विष्टलाई हटाउन नेपाली मात्र होइन मलेसियाकै कतिपय गिरोह महिनौँदेखि लागिपरेको चर्चा पहिले पनि चलेको थियो । उनलाई हटाउन र आफ्नो पुरानो साम्राज्य चलाउन वैदेशिक रोजगारमा संलग्न कतिपय व्यवसायी र वैदेशिक रोजगारीकै मेडिकल सञ्चालकहरू लागिपरेका थिए ।
विष्टलाई हटाएर रामेश्वरराय यादवलाई श्रम, रोजगार तथा सामाजिक सुरक्षामन्त्री बनाइएको छ ।
