कास्कीमा हुन लागेको उपनिर्वाचनमा आफ्नो उमेदवारलाई भोट माग्न दलहरुलाई भ्याइ नभ्याइ छ । मतदातालाई आकर्षित गर्न दल तथा कार्यकर्ताहरुले नयाँ-नयाँ फण्डा अपनाईरहेका छन् । समाजवादी पार्टिले पोखराको पृथ्वी चोकमा गरेको आमसभाले धेरैको ध्यान केन्द्रित गर्यो ।
सभामा आएका नेता कार्यकर्ताले बालुवाटार जग्गा काण्डमा मुछिएका नेकपाका महासचिव विष्णु पौडेलको फोटोसहित बालुवाटारको लालपुर्जा बोकेर सरकारको विरोध जनाएका थिए । उनीहरुले सरकारी जग्गा कब्जा बन्द गर, भ्रष्टाचार बन्द गर लगायतका नारा लगाएका थिए ।
त्यस्तै उनीहरुले तत्कालीन पर्यटन मन्त्री रविन्द्र अधिकारीलाई जोडेर वाइडबडी जहाजको प्रतिमूर्ति पनि प्रदर्शन गरे । समाजवादीको सभालाई सम्बोधन गर्न संघीय अध्यक्ष बाबुराम भट्टराई र अध्यक्ष उपेन्द्र यादव कास्की पुगेका थिए । समाजवादीले इन्जिनियर धर्मराज गुरुङलाई कास्की २ मा उम्मेदवार बनाएको छ ।
