मध्यरातमा सुनसरीको इटहरीमा एक कम्प्लेक्समा रहेको बिग बार रेष्टुरेण्टमा आगलागी भएको छ। आगलागीका कारण ६ करोड रुपैँया भन्दा बढीको क्षति भएको छ ।
इटहरीको मुख्य चौकमा रहेको दुई बर्ष अगाडी बनेको सूर्य कम्प्लेक्समा आगलागी भएको हो । विद्युत सर्ट भएर आगलागी भएको हुनसक्ने प्रहरीको अनुमान छ। शनिबार मध्यराती सूर्य कम्लेक्स स्थित बिग बार रेष्टुरेण्टबाट लागेको आगो ९ वटा दमकलको सहायतामा साढे तीन घण्टापछि नियन्त्रणमा आएको इलाका प्रहरी कार्यलय इटहरीले जनाएको छ ।
विराटनगर,दमक,सप्तरी,धरानको २ वटा दुहवी, महेन्द्रगर,सुन्दरहरैचा र इटहरीको गरि ९ वटा दमकल सँगै प्रहरीको सहायतामा आगो नियन्त्रणमा आएको हो ।
७ महिना यता संचालनमा आएको सो रेष्टुरेण्टमा ५ करोडको लगानी रहेको संचालक किरण कुमार बुढाथोकीले बताए । बुढाथोकीका अनुसार आफु १२ बजे रेष्टुरेन्ट बन्द गरेर घर हिँडेको राती १ बजे मात्र आफुले थाह पाएको बताए ।
आगलागीबाट बिग बार रेष्टुरेण्ट पूर्ण रूपमा जलेर नष्ट भएको छ भने सूर्य कम्लेक्सको भवनमा समेत क्षति हुन पुगेको छ ।
