आफ्नै महिला अनुयायीमाथि जबरजस्ती करणी (बलात्कार) गरेको अभियोग लागेका सिद्धबाबा भनिने कृष्णदास गिरीमाथिको थुनछेक बहस सोमबारसम्म जारी रहने भएको छ । जिल्ला अदालत सुनसरीमा आइतवार बहस नसकिएपछि सोमवार पनि बहस जारी रहने भएको हो ।
जिल्ला सरकारी वकिल कार्यालय सुनसरीले गत बिहीबार कृष्णदासविरुद्ध बलात्कार अभियोगमा जिल्ला अदालत सुनसरीमा मुद्दा दायर गरेको थियो । शुक्रबार कृष्णदासको अदालती बयान सकिएपछि आइतबार थुनछेक बहस भएको थियो ।
जिल्ला अदालत सुनसरीका न्यायाधीश राधाकृष्ण उप्रेतीको इजलाशमा थुनछेक बहस भएकोमा सोमवार वकिलहरुको बहस सकिएन् ।
सोमबार सरकारी वकिलसहित जाहेरीकर्ता (पीडित महिला)का तर्फबाट ८ जना वकिलहरुले बहस गरेका थिए ।
प्रतिवादी कृष्णदासको तर्फबाट ३ जना कानून व्यवसायीले बहस गरेका थिए । कृष्णदासको तर्फबाट ५ जना कानून व्यवसायीले बहस गर्ने भन्दै वकालतनामा दर्ता गराएकोमा अब २ जनाले मात्रै बहस गर्न बाँकी रहेको जिल्ला अदालत सुनसरीका प्रवक्ता गोपालप्रसाद गिरीले जानकारी दिए ।
कृष्णदासको तर्फका २ जना कानून व्यवसायीको बहस सकिएपछि सोमबार नै थुनछेक आदेश जारी हुने संभावना रहेको गिरीले बताए ।
जिल्ला सरकारी वकिल कार्यालयले गिरीविरुद्ध फौजदारी अपराध संहिताको दफा २१९ को उपदफा (३) को देहाय (ङ) बमोजिम अधिकत्तम १० वर्ष कैद सजाय मागदाबी गरेको छ ।
अपराध संहिताको दफा २१९ को उपदफा (३) को देहाय (ङ)मा १८ वर्ष वा १८ वर्षभन्दा बढी उमेरकी महिलालाई जबरजस्ती करणी गरेको प्रमाणित भएमा ७ वर्षदेखि १० वर्षसम्म कैद सजाय हुने व्यवस्था छ ।
गिरीविरुद्ध उनकै एक महिला अनुयायीले बलात्कार आरोप लगाएकी थिइन् । पीडित महिलाले प्रहरीमा उजुरी दिएपछि गिरी भने आफू बिरामी भएको भन्दै विराटनगरस्थित एउटा अस्पतालमा भर्ना भएका थिए ।
प्रहरीले गत मंसिर १८ गते गिरीलाई अस्पतालबाटै पक्राउ गरेको थियो । प्रहरीले पक्राउ गरेपछि पनि गिरी भने अस्पतालमै बस्दै आएका थिए ।
