१० वर्षीय बालकलाई अपहरण गरेको अभियोगमा बारा प्रहरीले दुई जनालाई पक्राउ गरी सार्वजनिक गरेको छ ।
अपहरणमा परेका ती बालकको कलैया उपमहानगरपालिका–२४ श्रीपुरस्थित सडकबाट आइतबार प्रहरीले उद्दार गरेको थियो ।
पक्राउ पर्नेहरुमा पर्सा वीरगंज महानगरपालिका–१४ गण्डक बहुअरी बस्ने रमेश राम र बारा प्रसौनी गाउँपालिका–५ प्रष्टोका बस्ने राजु राम रहेका छन् ।
गत शुक्रबार सरस्वती पूजाको बिसर्जन गर्न गएका ती बालक घर फर्की नआएको भन्ने खबर प्राप्त हुनासाथ ईलाका प्रहरी कार्यालय प्रसौनी बाराबाट खटिएको प्रहरीले खोजी जारी राखेको थियो ।
रामले अपहरणका मुख्य योजनाकार राजुलाई बुझाउन लैजाँदै गर्दा फेला पारी बालकको उद्दार गरेको हो । रामलाई नियन्त्रणमा लिई सोधपुछ गर्दा उनकै मामा राजुले बालकलाई ललाइफकाई अपहरण गरी ल्याउनु भनी नगद ५० हजार रुपैयाँ दिन्छु भनेपश्चात उनले बालकलाई अपहरण गरेको प्रहरी अनुसन्धानबाट खुलेको छ ।
उनीहरु उपर अपहरण तथा शरीर बन्धक मुद्दामा थप अनुसन्धान भइरहेको जिल्ला प्रहरी कार्यालय बाराले जनाएको छ ।
