फ्रेन्च लिग वान अन्तर्गत पिएसजी बराबरीमा रोकिएको छ । गएराती सम्पन्न खेलमा पिएसजी अमिएन्स क्लबसँग ४-४ गोलले बराबरीमा रोकिएको हो । ३-० ले पछि परेको अवस्थामा पिएसजीले खेलमा पुनरागमन गरेको थियो ।

अमिएन्सका लागि सेरहोउ गुइरासीले दुई गोल गरेका थिए भने गाएल काकुटा र फुस्सेनी डियाबाटेले एक एक गोल गरेका थिए । त्यस्तै पिएसजीका लागि भने एण्डर हरेरा र माउरो इकार्डीले एक एक गोल गरे भने टाँगगाइ कोउआसीले दुई गोल गरेका थिए ।

यस खेलमा पिएसजीका लागि नेइमार र किलियन एम्बाप्पे खेलेका थिएनन् । पिएसजी सन् २०१२ पछि पहिलो हाफमा ३-० ले पछि परेर पनि खेल बराबरी गर्न सफल भएको हो ।

यो बराबरीपछि पिएसजी २५ खेलमा ६२ अंकसहुत लिगमा शिर्ष स्थानमा कायम रहेको छ । दोस्रो स्थानमा रहेको मार्सेलीभन्दा १३ अंकको अग्रता बनाएको छ ।

त्यस्तै अमिएन्सको भने २५ खेलमा २१ अंक रहेको छ भने लिगको १९ औ स्थानमा रहेको छ ।