बार्पाक सुलिकोत ४ सौरपानी अर्चले भैलाममा सामूदायिक सहभागितामा निर्मित सिद्देश्वर महादेवको मन्दिर आउँदो महाशिवरात्रिको शुभ अवसरमा विधिवत उद्घाटन हुने कार्यक्रम रहेको छ । उक्त कार्यक्रममा विशेष चन्दादाताहरूलाई सम्मान पनि गरिने कुरा मन्दिर निर्माण समितीले जानकारी गराएको छ ।

यो मन्दिर सामूदायिक सहभागिताको हिसाबले विशेष गरी सौरपानी अर्चले गोर्खाकै स्थानीयबासीहरूको सानोतिनो सहयोग तथा राजधानीलगायत विदेशमा रहने सहयोगी हातहरूबाट प्राप्त लगभग १६ लाख रुपैयाँबाट निर्माण सम्पन्न गरिएको बुझिएको छ । मन्दिर बनाउन धेरैको महत्वपूर्ण भूमिका रहेको मन्दिर निर्माण समितिले जनाएको छ ।

कार्यक्रमअनुसार आगामी फाल्गुण ७ गते यज्ञस्थलको निर्माण गर्ने, ८ र ९ गते शिवपुराण वाचनसँगै ९ गते नै महाशिवरात्रिको अवसर पारेर विशेष समारोहका बीच जेष्ठ नागरिकको हातबाट मन्दिरको उद्घाटन गरिने कार्यक्रम रहेको मन्दिर निर्माण समितिले जनाएको छ । मन्दिर उद्घाटनको अघि र पछि विशेष भजन कीर्तन हुने पनि जनाइएको छ ।