कोरोना भाइरस फैलने क्रम बढेपछि यतिबेला भारत र नेपाल दुबै मुलुक लकडाउनमा रहँदा २ सय भन्दा बढी नेपालीचाहीं दिल्लीमै अलपत्र परेका छन् । नेपाल आउन हिँडेका करिब दुई सय नेपाली अझै दिल्लीमा अलपत्र परेका हुन् । महामारीको त्रासले भारतमा काम गर्दै आएका उनीहरु व्यापार व्यवसाय बन्द भएपछि नेपाल हिँडेका हुन् ।

भारतमा लकडाउन भएपछि उनीहरु दिल्लीमै अलपत्र अवस्थामा रहेका हुन् । घर जानै लागेपछि लकडाउनले यात्रुवाहक रेल र बससेवा बन्द भएपछि उनीहरु अलपत्र परेका हुन् । उनीहरुमध्ये दिल्लीको नोयडा सेक्टरमा ८० भन्दा बढी अलपत्र छन् । पचासभन्दा बढी अधिकांश त्यही क्षेत्रमा क्यान्टिन, पसल र ठेला गाडा चलाउने लगायतका पेशामा संलग्न थिए।

यस्तै पचास भन्दा बढी हरियाणाको गुवगावँको मेदान अस्पताल छेउछाउमा अलपत्र परेको बताइएको छ । बैंग्लोरबाट आएका २५ जना त दिल्लीकै छतरपुरमै तीन दिनदेखिनै अलपत्र अवस्थामा छन् । यसका अतिरिक्त गोवाबाट आएका दश जना दिल्लीको पन्जाबी बागमा अलपत्र छन् ।

नेपाली अलपत्र परेका सूचना पाएपछि भारतस्थित नेपाली दूतावासले खानपानको प्रबन्ध गर्दै के गर्न सकिन्छ भन्नेबारे समन्वयको तयारी थालेको छ ।