कोरोना भाइरस (कोभिड–१९)बाट पछिल्लो २४ घण्टामा अमेरिकामा मात्रै दुई हजारभन्दा धेरैले ज्यान गुमाएका छन् । २४ घण्टामा विश्वभर ७ हजार ९ जनाले ज्यान गुमाउँदा अमेरिकामा दुई हजार ४३ जनाको मृत्यु भएको छ । तथ्यांक अनुसार यो अहिलेसम्म एउटै देशमा २४ घण्टामा यति धेरैले ज्यान गुमाएको पहिलोपटक हो ।
सोही अवधीमा फ्रान्समा ९८७, स्पेनमा ६३४, इटलीमा ५७० जनाको ज्यान गएको छ । बेलायतमा २४ घण्टाको अवधीमा ९८०, बेल्जियममा ४९६ ले कोरोनाका कारण २४ घण्टामा ज्यान गुमाउनु परेको छ ।
पछिल्लो २४ घण्टामा कोरोनाका ९४ हजार १०८ संक्रमित थपिएका छन् । यसमा अधिक संख्या अमेरिकामा छ । अमेरिकामा मात्रै ३३ हजार ७५२ कोरोनाका नयाँ संक्रमितको पहिचान भएको छ ।
विश्वभर ४९ हजार कोरोना संक्रमितको अवस्था गम्भीर हुँदा अमेरिकामा मात्रै यो संख्या १० हजार ९१७ रहेको छ ।
