गएको २४ घण्टाभित्रै अमेरिकामा अहिलेसम्मकै सबैभन्दा बढी २६ सय कोरोना संक्रमितले ज्यान गुमाएका बेला त्यहाँका राष्ट्रपति डोनाल्ड ट्रम्पले महामारीको चरमसीमा यत्तिमै सीमित रहने दाबी गरेका छन् । अमेरिकामा हालसम्म ३० हजार भन्दा बढी संक्रमितको ज्यान गएको जोन हाप्किन्स विश्वविद्यालयले जनाएको छ।

जुन कुनै एक देशमा कोरोनाका कारण भएको अहिलेसम्मकै ठूलो मानवीय हताहती हो । पछिल्लो तथ्यांकले अब अमेरिकाको आर्थिक गतिविधी खुला गर्न मार्गप्रशस्त भएको पनि ट्रम्पले तर्क गरेका छन् । तर त्यहाँ अन्य देशको तुलनामा सबैभन्दा बढी अर्थात झण्डै साढे ६ लाख संक्रमित भेटिएका छन् । नयाँ संक्रमितको संख्या पनि बढिरहेको छ ।

चीनको उहानमा पहिलो कोरोना संक्रमित पत्ता लाग्दा अमेरिकी राष्ट्रपति ट्रम्पले त्यसलाई चिनियाँ भाइरसको संज्ञा दिएका थिए । नागरिकले लकडाउन र स्वास्थ्य सजगताका लागि बारम्बार आग्रह गर्दा पनि उनले आफूलाई आगामी चुनावमा हराउन मानिसहरु लागिपरेको जिकिर गरेका थिए । संक्रमण फैलिएर सैयौं मानिसको ज्यान गइसक्दा पनि अमेरिकामा मानवीय जमघटमा रोक लगाइएको थिएन। संक्रमण रोकथाममा अमेरिकाले लापरवाही गरेपछि विश्वभर राष्ट्रपति ट्रम्पको आलोचना हुँदै आएको छ ।