उच्च शिक्षालय तथा माध्यमिक विद्यालय संघ नेपाल (हिसान)ले कोरोना भाइरसको असर नदेखिएको ठाउँमा शैक्षिक संस्था खोल्न र स्थगित भएका विद्यालय तहदेखि विश्वविद्यालयका परीक्षाहरूको तालिका सार्वजनिक गर्न सरकारसँग माग गरेको छ ।
हिसानले भर्ना, परीक्षा, सहुलियतलगायतका माग राखी प्रधानमन्त्री तथा मन्त्रिपरिषद्को कार्यालय, उपप्रधान तथा रक्षामन्त्री तथा कोभिड– १९ रोकथाम तथा नियन्त्रण उच्चस्तरीय समितिका संयोजक, अर्थमन्त्री र शिक्षामन्त्रीलाई मंगलबार ध्यानाकर्षण पत्र बुझाएको छ ।
कोरोना भाइरस संक्रमणको त्रासबाट मानसिक एवं शारीरिक रूपबाट विद्यार्थीहरूलाई मुक्त गर्न, अभिभावक, नागरिक समाजलाई सचेत र आश्वस्त तुल्याउन तथा विद्यालय, कलेजहरूलाई यथाशीघ्र छिटो खुल्ने वातावरण बनाई पठनपाठन तथा परीक्षालाई सुचारु गर्न हिसानले ध्यानाकर्षण गराएको छ । कोरोना भाइरसको खासै असर नपरेको क्षेत्रमा तुरुन्त र अन्य क्षेत्रमा क्रमशः सुरक्षित र व्यवस्थित तरिकाले खोल्ने वातावरण बनाउन माग गरेको छ ।
लामो समयसम्म शैक्षिक गतिविधि ठप्प रहेकाले दीर्घकालीन असर पर्न नदिन र न्यायोचित समाधानका लागि सरकारलाई ध्यानाकर्षण गराएको हिसानका महासचिव लोकबहादुर भण्डारीले बताए । हिसानले विद्यार्थीलाई मानसिक रूपमा तयार रहने वातावरण बनाउन र परीक्षाको तालिका सार्वजनिक गर्न माग गरेको छ । सहुलियतको व्यवस्था गर्न पनि हिसानले माग गरेको छ ।
