केही महिनाअघि ‘तातोपानी खाँदा वा बाफ लिँदा कोभिड–१९ को संक्रमण नहुने’ बताएका प्रधानमन्त्री केपी शर्मा ओलीको उक्त अभिव्यक्तिलाई लिएर गैरजिम्मेवार भएको भन्दै त्यतिबेला सामाजिक सञ्जालमा उनको आलोचना भएको थियो । फेरि पछिल्लो पटक कोभिड–१९ को बारेमा प्रधानमन्त्रीले दिएको अभिव्यक्तिको यतिबेला आलोचना भइरहेको छ ।

राष्ट्रियसभाको बिहीबारको बैठकमा प्रधानमन्त्री केपी शर्मा ओलीले कोरोनाबारे धेरै लामो भाषण गरे । सो क्रममा प्रधानमन्त्री ओलीले कोरोना भाइरसलाई रूघाखोकीसँग तुलना गर्दै भनेका थिए ‘कोरोनाले छुने बित्तिकै मर्छु अब म, गएँ भन्ठान्यो भने बाँच्न झन् गाह्रो हुन्छ । कोरोना भनेको एउटा रूघाखोकी जस्तो लागिहाल्यो भने हाछ्युँ साछ्युँ गर्नुपर्छ, तातोपानी खानु पर्छ, उडाइदिनु पर्छ । त्यो हिसाबले सोच्नु पर्छ । त्यो मनोबल राख्नुपर्छ ।’ प्रधानमन्त्री यतिमा मात्रै रोकिएनन् बेसारको बारेमा पनि लामै समय खर्च गर्न भ्याए । प्रधानमन्त्रीको उक्त अभिव्यक्तिलाई लिएर सामाजिक सञ्जालमा सकारात्मकभन्दा नकारात्मक टिका टिप्पणी धेरै भएका छन् ।

नेपालको दोस्रो कोरोना संक्रमित प्रसिद्धि श्रेष्ठले ट्विटरमा प्रधानमन्त्रीको भनाइप्रति आपत्ति जनाउँदै कोरोनालाई सामान्य रूघाखोकी जस्तो नठान्न आग्रह गरेकी छिन् । नेपालको दोस्रो संक्रमित प्रसिद्धि निको भइसकेकी छन् । ‘मैले कोरोना भोगिसकेको छ, यो कुनै सामान्य फ्लू होइन, श्वास फेर्न गाह्रो हुन्छ, थकाइ लाग्छ । कृपया आफ्नो मनोरञ्जनको लागि कोरोना बिरामीको दुःखमा नखेल्नुहोस्, यो बकवास अत्ति भयो’ प्रसिद्धले ट्विटरमार्फत लेखेकी छन् ।

प्रधानमन्त्री आलीले बेसारका बारेमा भनेका थिए, ‘बेसार पनि कुनै–कुनै अवस्थामा खान हुँदैन । जन्डिस लागेको छ भने रक्तअल्पत्ता भएको छ भने बेसार खानु हुँदैन । गर्भवती र सुत्केरी महिलाले बेसार खान हुँदैन । आइरन र ब्लडको कमी छ भने बेसार खानु हुँदैन ।’ उनको यो अभिव्यक्तिपछि वीर अस्पतालका प्रा.डा. सुधांशु केसीले प्रधानमन्त्रीले गलत सूचना दिएको भन्दै ‘कुन किताबमा लेखेको छ जण्डिसमा बेसार खान हुन्न भनेर ?’ भनी प्रतिप्रश्नसमेत गरेका छन् ।

त्यस्तै पूर्वप्रधानमन्त्री तथा जनता समाजवादी पार्टीका नेता डा. बाबुराम भट्टराईले प्रधानमन्त्री केपी शर्मा ओलीलाई छिटो विदा दिनुपर्ने टिप्पणी गरेका छन् । भट्टराईले भनेका छन्, ‘देशको प्रमले पटकपटक यस्ता बेसुरका कुरा गर्दा हामी सुनेर बस्छौं वा प्रतिवाद गर्न डराउँछौं भने गरिबी, धामीझाँक्री र अन्धविश्वासको दुष्चक्रमा परेका जनताले किन उनलाई साँच्चैको डाक्टर वा अलौकिक पात्र नमानून् ?’ साथै उनले अगाडि लेखेका छन् ‘अब सबैले साहस बटुलेर भन्नैपर्छ । प्रमको स्वास्थ्य ठीक छैन, छिटो विदा दिनैपर्छ ।’