नवकान्तिपुर संवाददाता
काठमाडौं, २६ असार ।
भारतीय टेलिभिजन च्यानल जी न्युजका प्रधान सम्पादक सुधीर चौधरीले नेपालीहरुसँग माफी मागेका छन् । सुधीर चौधरीले नेपाली समय अनुसार राती ९ः१५ बजे डीएनए नामक समाचार सम्बन्धी कार्यक्रम चलाउँदै आएका छन् ।
जी न्युजको बिहार–झारखण्ड संस्करणले प्रधानमन्त्री केपी शर्मा ओली र चिनियाँ राजदूत होउ यान्छीको चरित्रहत्या गर्ने उद्देश्य स्वरुप भिडियो स्टोरी प्रशारण गरेपछि केही नेपाली डिटिएच र केबल अपरेटरहरुले भारतीय न्युज च्यानल प्रशारण बन्द गरेका थिए । त्यसपछि सुधिरले ट्वीट गर्दै नेपालीहरु भारतीय समाचारवाचकहरुसँग डराएको प्रतिक्रिया दिएका थिए । भारतले नेपाललाई अहिलेसम्म कुनै कारवाही नगरेको भन्दै उनले धम्कीको भाषा पनि बोलेका थिए ।
नेपाल र भारतबीच सीमा विवाद भइरहेको बेला सुधिरले ‘डिएनए’ भन्ने कार्यक्रममा दुवै देशको सेनाको अवस्था तुलना गरेर द्वन्द्व भए नेपालको अवस्था कमजोर हुने प्रतिक्रिया समेत दिएका थिए ।
बिहिवारको ट्वीटमा उनले सेना परिचालन हुने अवस्था नै नआइकन नेपाल समाचारवाचकहरुसँग डराएको अभिव्यक्ति दिएका थिए । उनको त्यो ट्वीटलाई लिएर नेपालमामात्र नभइ भारतमा पनि विरोध भयो । भारतीयहरुले मोदी सरकार टिकटकसँग डराएको भन्दै उनको आलोचना गर्न सुरु गरे । सुधिरले संचालन गर्दै आएको कार्यक्रमलाई भारतमै राम्रो मानिदैन । उनले प्रशारण गर्ने कन्टेन्टहरु प्रो मोदी हुने भएकाले धेरैले आलोचना गर्दै आएका छन् । त्यसैले भारतीयहरुले नेपालमामात्रै नभइ भारतमा समेत जी न्युजसहितको भारतीय न्युज च्यानल प्रतिबन्ध लगाउनुपर्ने भन्दै सुधिरलाई ट्वीटको उत्तर दिएका थिए ।
मेरे इस ट्वीट से नेपाल के हमारे दर्शक आहत हुए हैं।यहाँ भारत में भी बहुत से लोगों ने मुझे लिखा कि ये विचार सही नहीं है।सम्भव है कि मैंने ये खबर आने के बाद आवेश में अनावश्यक प्रतिक्रिया कर दी हो।ये मंच अभिव्यक्ति का है,आहत करने का नहीं।इसलिए खेद जताते हुए इस ट्वीट को हटा रहा हूँ।🙏 https://t.co/mqTL652uOe
— Sudhir Chaudhary (@sudhirchaudhary) July 10, 2020
‘यस ट्वीटबाट हाम्रा नेपाली दर्शकलाई आहत भएको छ। यो मञ्च अभिव्यक्ति दिनका लागि हो कसैलाई आहत बनाउन होइन। यसैले म खेद व्यक्त गर्दै उक्त ट्वीट हटाउँदैछु,’ उनले लेखेका छन् ।
लगत्तै सुधीरले नेपालीहरुलाई अपमानजनक शब्द प्रयोग गरेर गरेको ट्वीट हटाएका छन् ।
