नवकान्तिपुर संवाददाता
काठमाडौं, १ साउन ।
सिन्धुपाल्चोकमा गएराति पहिरोले एकै परिवारका ५ जना बेपत्ता भएका छन् । सिन्धुपाल्चोकको भोटेकोशी गाउँपालिका वडा नम्बर ४ मा स्थानीय ज्ञान्जेन शेर्पाको घर पहिरोमा पुरिँदा उनकी आमा, श्रीमती, बहिनी र दुई छोरी बेपत्ता भएका वडाअध्यक्ष साङदोर्जे शेर्पाले जानकारी दिए ।
ज्ञान्जेन भने कामका सिलसिलामा काठमाडौंमा बस्दै आएकाले पहिरोबाट जोगिएका छन् । अविरल वर्षापछि राति २ बजे पहिरो खसेको थियो । पहिरोले पुरेको अर्को घरमा भने मान्छे नबस्ने वडाअध्यक्ष शेर्पाले जानकारी दिए।
पहिरोले स्थानीय सेतीदेवी पञ्चकन्या प्राविको पर्खाल र भवनमा पनि क्षति पुगेको छ। घटनास्थलमा प्रहरी पुगिनसकेको र स्थानीय बासिन्दाले हराइरहेकाको खोजी गरिरहेको वडाअध्यक्ष शेर्पाले जानकारी दिए।
