अमेरिकाले आउँदो नोभेम्बरमा हुने राष्ट्रपति चुनाव अगाडि आफ्नो कमजोरीका लागि बेइजिङ्गलाई दोष लगाउने प्रयास स्वरुप ह्यस्टनमा रहेको वाणिज्य दूतावास बन्द गर्न भनेको भन्दै चीनको सरकारी सञ्चारमाध्यमले निन्दा गरेको छ । बिहीबार चीनको सरकारी सञ्चार संस्थाले सम्पादकीयमा अमेरिकी निर्णयको निन्दा गरेको हो।

अमेरिकाले बुधबार ह्युस्टनमा रहेको वाणिज्य दूतावास बन्द गर्नका लागि चीनलाई ७२ घण्टाको अल्टिमेटम दिएको थियो । अमेरिकी बौद्धिक सम्पतीको रक्षा अमेरिकीको व्यक्तिगत विवरणको सुरक्षामा चीनबाट खतरा उत्पन्न भएको भन्दै अमेरिकाले बुधबार वाणिज्य दूतावास बन्द गर्न आदेश दिएको समाचार संस्था रोयटर्सले जनाएको छ ।

यसपछि अमेरिका र चीनबिच नाटकीय रुपमा तनाव बढेको छ । हालै अमेरिकी विदेश मन्त्री माइक पोम्पेओले चीनविरुद्ध विश्व समुदाय एक हुनु पर्ने बताएका थिए ।

अमेरिकास्थित चिनियाँ दूतावासले वाणिज्य दूतावास बन्द गराउने कार्य ‘राजनीतिक उक्साहट’ रहेको बताएको छ । चिनियाँ दूतावासले तत्काल सो निर्णय फिर्ता लिन माग गरेको छ ।