नेकपाका वरिष्ठ नेता माधवकुमार नेपालले विधिको पालना नगरेर ‘मै स्टेट हुँ’ भनेर आफूलाई सर्वोपरी ठान्न थालियो भने त्यसले कोही कसैको हित नगर्ने बताएका छन् । नेकपाका संस्थापक महासचिव पुष्पलाल श्रेष्ठको स्मृति दिवसका अवसरमा आयोजित कार्यक्रममा नेता नेपालले भने, ‘आफूलाई मात्रै केन्द्रबिन्दुमा राख्न थालियो, आफूबाहेक दुनियाँमा कसैको अर्थ छैन भन्ने ठान्न थालियो, त्यस्तो अहंकारको भावनाबाट चल्न थालियो भने त्यस्तो अवस्थामा त्यो व्यक्ति र प्रवृत्तिको पतन हुनेबाहेक अर्को केही पनि हुँदैन ।’

उनले पार्टी नेतृत्वमा रहेका हामी कोही त्यस्तो विचार र प्रवृत्तिमा चुर्लुम्म डुबेका छौं भने त्यसबाट उम्किन सके जोगिने भन्दै समय छँदै विचार गर्नुपर्ने बताए । कम्युनिस्ट आन्दोलनका हितका लागि हामीले आफूलाई सुधार गरेर जानुपर्नेमा जोड दिँदै वरिष्ठ नेता नेपालले नयाँ शिराबाट अगाडि बढेर रुपान्तरित हुनुको विकल्प नभएको उल्लेख गरे ।

नेता नेपालले भने, ‘नेपाली जनताको नासोका रूपमा रहेको यो आन्दोलन र कम्युनिस्ट पार्टीलाई राम्ररी अगाडि लिएर जान सुविचारित, सुसङ्गठित ढङ्गले काम गर्नका लागि नयाँपुस्तालाई सग्लोरूपमा नै दिने ढङ्गले सोचौं ।’ आफूसँगसँगै आन्दोलनलाई नै समाप्त पार्ने मूर्खतापूर्ण काम कोही कसैबाट नहोस् भन्नेमा आफ्नो शुभेच्छा र सद्भाव रहेको बताए ।

उनले भने, ‘तपाईंहरूलाई चिन्ता छ कम्युनिस्ट पार्टी फुट्छ कि भनेर, फुट्दैन । कसैले फुटाउन खोज्यो भने चोइटिएर जाला तर कम्युनिस्ट पार्टी फुट्नेवाला छैन ।’ कम्युनिस्ट आन्दोलनलाई नयाँ उचाइमा पुर्याउने काम आफूहरुले गरिरहेको भन्दै नेता नेपालले हामीले सक्छौं भन्ने सङ्कल्प र आँटका साथ पार्टीलाई अगाडि बढाउनुपर्ने धारणा राखे।

उनले भ्रम पैदा गर्ने वा कुप्रचार गर्नेको पछि लाग्नुपर्ने कुनै कारण नभएको भन्दै तरङ्गीत नहुनसमेत पार्टीका नेता तथा कार्यकर्तालाई आग्रह गरे ।