सत्तारुढ नेपाल कम्युनिष्ट पार्टी (नेकपा) को आज (मंगलबार) को सचिवालय वैठक मुख्य एजेण्डा मन्त्रिपरिषद पुनर्गठनको विषयमा नभई अन्य विषयमा मात्र छलफल र निर्णय भएका छन् । आज मन्त्रिपरिषद पुनर्गठनका बारेमा छलफल हुने भनिएको भए पनि दोस्रो एजेण्डाको रुपमा रहेको संवैधानिक आयोगका पदाधिकारी नियुक्तिबारेमा छलफल र निर्णय गर्दै सकिएको हो ।

बैठकपछि पत्रकारसँग कुरा गर्दै प्रवक्ता नारायणकाजी श्रेष्ठले बैठकले संवैधानिक परिषद्को बैठक राखेर आयोग पदाधिकारी नियुक्ति प्रक्रिया अगाडि बढाउने निर्णय गरिएको जानकारी दिएका छन् । आजको वैठकमा मन्त्रिपरिषद पुनर्गठनबारे छलफल नभएको बताएका छन् । ‘मन्त्रिपरिषद् पुनर्गठनका बारेमा अस्ती भएको बाहेक थप छलफल भएको छैन’, प्रवक्ता श्रेष्ठले भने । यता सचिवालय बैठकले पार्टीको सांगठनिक एकताको ठोस प्रस्ताव १० दिनभित्र ल्याउने जिम्मा दुई अध्यक्ष र महासचिवलाई दिएको छ ।

पार्टी प्रवक्ता नारायणकाजी श्रेष्ठका अनुसार मंगलबार प्रधानमन्त्रीको सरकारी निवास बालुवाटारमा बसेको बैठकले अध्यक्ष एवम् प्रधानमन्त्री केपी ओली र अर्का अध्यक्ष पुष्पकमल दाहाल ‘प्रचण्ड’ सँगै महासचिव विष्णु पौडेललाई सांगठनिक एकताको ठोस प्रस्ताव ल्याउनका निम्ति १० दिनको म्याद दिएको हो ।

‘सांगठनिक एकीकरणका बाँकी काम पूरा गर्न गर्ने सन्दर्भमा १० दिनभित्र अध्यक्ष र महासचिवले ठोस प्रस्ताव सचिवालयमा प्रस्तुत गर्ने निर्णय भएको छ’, उनले भने, ‘त्यसका आधारमा सांगठनिक एकीकरणको विषयमा टुंगो सचिवालयले लगाउने छ ।’

बैठकमा नेपाल विद्युत प्राधिकरणका कार्यकारी निर्देशक कुलमान घिसिङबारे पनि कुनै छलफल भएन ।