टी-२० वरीयतामा नेपालले एक स्थान माथि उक्लिएको छ । अन्तराष्ट्रिय क्रिकेट परिषद (आईसीसी) ले आइतबार सार्वजनिक गरेको नयाँ वरीयतामा नेपाल एक स्थान उक्लदै १२ औं स्थानमा रहेको हो ।
यस अघि नेपाल वरीयताको १३ औं स्थानमा रहेको थियो । नेपाल टेस्ट राष्ट्र आयरल्याण्ड भन्दा माथि रहेको छ । त्यस्तै आईसीसीले सार्वजनिक गरेको टी-२० को नयाँ वरीयताको शीर्ष स्थानमा इंग्ल्यान्ड, दोस्रोमा भारत र तेस्रोमा न्युजिल्याण्ड रहेको छ भने पाकिस्तान चौंथो र अष्ट्रेलिया पाँचौं स्थानमा रहेका छन् ।
यस्तै एकदिवसीय वरीयतामा भने नेपाल १६ औं स्थानमै यथावत रहेको छ । यस अघि पनि नेपाल १६ औं स्थानमै रहेको थियो । एकदिवसीयको नयाँ वरीयतामा शीर्ष स्थानमा न्युजिल्याण्ड, दोस्रोमा इंग्ल्यान्ड र अष्ट्रेलिया तेस्रो स्थानमा रहँदा भारत चौंथो र दक्षिण अफ्रिका पाँचौं स्थानमा रहेका छन् ।
