स्पेनिस ला लिगा फुटबल अन्तर्गत शनिबार राति भएको खेलमा बार्सिलोना बराबरीमा रोकिएको छ । गए राति भएको खेलमा एथ्लेटिक बिल्बाओले बार्सिलोनालाई १-१ को बराबरीमा रोकेको हो ।

बिल्बाओको घरेलु मैदानमा भएको निकै प्रतिस्पर्धात्मक खेलमा खेलको पहिलो हाफ गोलरहित बराबरीमा सकिएको थियो । तर, दोस्रो हाफको ५० औं मिनेटमा इनिगो मार्टिनेजले गोल गर्दै घरेलु टोलीलाई अग्रता दिलाएका थिए । यद्यपि खेलको ७५ औं मिनेटमा मेम्फिस डिपेले गोल गर्दै खेललाई बराबरीमा ल्याए । त्यसपछि थप समयमा कुनै टोलीबाट गोल भएन र खेल १-१ को बराबरीमा सकियो ।

त्यस्तै, दोस्रो हाफको इन्जुरी समयमा बार्सिलोनाका ईरिक ग्रासियाले रातो कार्ड पाएपछि केहि समय बार्सिलोना १० खेलाडीमा समेटिएको थियो ।बराबरीसँगै बार्सिलोना २ खेलमा ४ अंक जोड्दै तालिकाको शीर्ष स्थानमा छ भने २ खेलम २ अंक जोडेको बिल्बाओ नवौं स्थानमा रहेको छ ।