स्पेनिस ला लिगा फुटबल अन्तर्गत आइतबार राति भएको खेलमा रियल मड्रिड र लेभान्टेले बराबरी खेलेका छन् । गए राति भएको खेलमा लेभान्टेले रियललाई ३-३ को बराबरीमा रोकेको हो ।

लेभान्टेको घरेलु मैदानमा भएको निकै प्रतिस्पर्धात्मक खेलमा खेलको पाँचौं मिनेटमा ग्यारेथ बेलले गोल गर्दै रियललाई अग्रता दिलाएका थिए । पहिलो हाफ १-० मा सकिएको खेलमा दोस्रो हाफको ४६ औं मिनेटमा लेभान्टेका लागि रोजरले गोल गर्दै खेललाई बराबरीमा ल्याए । त्यस्तै, खेलको ५७ औं मिनेटमा जोसे क्याम्पनाले गोल गर्दै लेभान्टेलाई २-१ को अग्रता दिलाए ।

यस्तै, खेलको ७३ औं मिनेटमा रियलको लागि भिनिसियस जुनियरले गोल गर्दै खेललाई २-२ को बराबरीमा ल्याए । त्यसैगरी खेलको ७९ औं मिनेटमा रोबरले गोलबाट लेभान्टेलाई ३-२ ले अघि रह्यो । तर, व्यक्तिगत दोस्रो गोल गर्ने क्रममा खेलको ८५ औं मिनेटमा जुनियरलेगोल गर्दै खेललाई ३-३ को बराबरीमा ल्याउदै टोलीलाई हारबाट जोगाए । खेलको ८७ औं मिनेटमा लेभान्टे ऐटरले रातो कार्ड पाएपछि लेभान्टे १० खेलाडीमा समेटिएको थियो ।

बराबरीसँगै रियल २ खेलबाट ४ अंक जोड्दै तालिकाको दोस्रो स्थानमा छ भने २ खेलबाट २ अंक जोडेको लेभान्टे आठौँ स्थानमा रहेको छ । स्पेनिस ला लिगा फुटबल अन्तर्गत आइतबार राति नै भएको अर्को खेलमा एटलेटिको मड्रिडले इल्चेलाई १-० ले पराजित गरेको छ । गए राति भएको खेलमा खेलको ३९ औं मिनेटमा एन्जल कोर्रियाले गरेको गोलनै एटलेटिकोलाई जित दिलाउन पर्याप्त रह्यो ।

जितसँगै एटलेटिको २ खेलबाट ६ अंक जोड्दै तालिकाको शीर्ष स्थानमा उक्लेको छ भने २ खेलमा १ अंक जोडेको इल्चे १६ औं स्थानमा रहेको छ ।