नेपाली कांग्रेसका प्रवक्ता विश्वप्रकाश शर्माले महामन्त्रीमा आफ्नो उम्मेदवारी घोषणा गरेका छन्। जननायक बीपी कोइरालाको जन्म जयन्तीको अवसर पारेर शर्माले आज(बिहीबार) काठमाडौंको सुन्दरीजलबाट महामन्त्रीमा उम्मेदवारी घोषणा गरेका हुन् ।

उनले भने, ‘महामन्त्रीमा मेरो उम्मेदवारी काँग्रेसलाई लगातार १५ वर्षसम्म सरकारको नेतृत्व गराएर बीपीले कल्पना गरेको विकासको मोडल साकार गर्न हा । म महामन्त्री भएर त्यसको लागि लागिपर्नेछु ।’ शर्माले बीपीले कल्पना गरेको विकासको मोडल साकार गर्न आफूले उम्मेदवारी दिएको बताए ।

उनले आफ्नो उम्मेदवारीबारे सभापति शेरबहादुर देउवासँग पनि सल्लाह गरिसकेका एक स्रोतले बताएको छ । यसअघि युवा नेता गगन थापाले पनि महामन्त्रीमा आफ्नो उम्मेदवारी घोषणा गरिसकेका छन् । कांग्रेसका अर्का युवा नेता प्रदीप पौडेल पनि महामन्त्रीका आकांक्षी हुन् । उनले क्रियाशील सदस्यताको अन्तिम टुंगो लागेपछि महामन्त्रीमा उम्मेदवारी घोषणा गर्ने तयारी गरेका छ्न् । कांग्रेसको विधानमा दुई महामन्त्रीको व्यवस्था छ।

कांग्रेसले अझै २० जिल्लाको सदस्यता टुंग्याउन बाँकी छ। पार्टीले गठन गरेको छानबिन समितिले अहिलेसम्म ५६ जिल्लाको क्रियाशील सदस्यताको नामावली मात्रै सार्वजनिक गरेको छ।