रियल सोसिडाड स्पेनिस ला लिगाको शीर्षस्थानमा उक्लिएको छ । शनिबार राति भएको खेलमा मालोर्का सोसिडाडसँग १-० ले पराजित हुन पुग्यो ।

सोसिडाडको घरेलु मैदानमा भएको निकै प्रतिस्पर्धात्मक खेलमा जुलेन लोबेटले गोल गरेका थिए । पहिलो हाफ गोलरहित बराबरीमा सकिएको खेलमा खेलको ९० औं मिनेटमा मार्टिन जुविमेन्डीको पासमा लोबेटले गोल गर्दै सोसिडाडलाई अग्रता दिलाए थिए । त्यसपछि थप समयमा दुवै टोलीबाट गोल हुन सकेन र खेल सोसिडाडले १-० ले आफ्नो पक्षमा पार्यो ।

यसअघि पहिलो हाफको इन्जुरी समयमा अइहेन मुनोज दोहोरो पहेँलो कार्ड सहित रातो कार्ड पाउँदै मैदान बाहिरिएपछि सोसिडाड १० खेलाडीमा समेटिएको थियो । जितसँगै सोसिडाड ९ खेलमा २० अंक जोड्दै तालिकाको शीर्ष स्थानमा छ भने ११ अंक जोडेको मालोर्का १२ औं स्थानमा रहेको छ ।