युएई र ओमानमा जारी आईसीसी टी-ट्वान्टी विश्वकप क्रिकेटमा दक्षिण अफ्रिकाले तेस्रो जित निकालेको छ । मंगलबार भएको खेलमा बंगलादेश दक्षिण अफ्रिकासँग ६ विकेटले पराजित हुन पुग्यो ।

अबुधावीमा टस हारेर पहिले ब्याटिङ गरेको बंगलादेश १८ ओभर २ बलमा अल आउट हुँदै ८४ रनमा समेटियो । बंगलादेशका लागि महेदी हसनले २७ रन बनाए भने लिटोन दासले २४ रन जोड्नु बाहेक अन्यको प्रदर्शन सम्झनलायक रहेन । दक्षिण अफ्रिकाका लागि कगिसो राबाडा र एनरिच नोर्जले समान ३–३ विकेट लिए भने तबरेज सम्सीको भागमा २ विकेट रहेको थियो ।

८५ रनको सामान्य लक्ष्य लिएर मैदान उत्रेको दक्षिण अफ्रिकाले १३ ओभर ३ बलमा ४ विकेट गुमाउदै पूरा गर्यो । दक्षिण अफ्रिकाका लागि कप्तान टेम्बा बावुमा ३१ रनमा अविजित रहे भने क्विनटन डी ककले १६ रन बनाए । बंगलादेशका लागि टास्किन अहमेदले २ विकेट लिए भने महेदी हसन र नसुम अहमदको भागमा समान १-१ विकेट रह्यो ।

जितसँगै दक्षिण अफ्रिका ४ खेलबाट ६ अंक जोड्दै तालिकाको दोस्रो स्थानमा उक्लदै सेमिफाइनल नजिक पुगेको छ भने बंगलादेश प्रतियोगिताबाट बाहिरिएको छ । त्यसैगरी मंगलबार भएको अर्को खेलमा नामिबियालाई ४५ रनले हराउँदै पाकिस्तान सेमिफाइनलमा प्रवेश गरेको छ ।

प्रतियोगिता अन्तर्गत आज दुई खेल हुने छन् । पहिलो खेलमा न्युजिल्याण्ड र स्कटल्याण्ड भिड्दै छन् भने दोस्रो खेलमा अफगानिस्तान र भारत आमने सामने हुँदै छन् ।