सियरा लियोनको एक राजमार्गमा इन्धन बोकेको एक ट्याङ्कर दुर्घटनामा पर्दा भएको आगलागीमा कम्तीमा पनि १०८ जनाको निधन भएको छ ।

सो दुर्घटनामा परेर अरु ९२ जना जलेर घाइते भएका बताइएको छ । यसमा परेर घाइते भएकाहरुमध्ये अधिकांशको अवस्था गम्भीर रहेको छ । उनीहरूको शरीर जलेको बताइएको छ । सियरा लियोनको राजधानी फ्रिटाउनमा शुक्रवार साँझतिर भएको दुर्घटनामा परी ज्यान जानेको सङ्ख्या १०८ पुगेको यहाँका अधिकारीहरूले शनिबार जनाएका छन् ।

शनिबार राति सम्ममा १०८ जनाको मृत्यु भएको उपराष्ट्रपतिले नै पुष्टि गरेका छन् । उपराष्ट्रपति मोहम्मद जुल्डेह जाल्लोहले अस्पतालमा अरु करिब ९० जनाको उपचार भइरहेको पनि जानकारी दिए । उपचार भइरहेकामध्ये अधिकांशको शरीरका धेरै भाग जलेका छन् । उद्धारकर्ता र अस्पतालमा उपचार गराइरहेका स्वास्थ्यकर्मीले पनि १०८ जनाको मृत्यु भइसकेको र अरु ९२ जनाको उपचार भइरहेको बताएका छन् ।

चिकित्सकहरूले दिएको जानकारीमा घाइते हुनेमा महिला र बालबालिका पनि रहेका छन् । तीमध्ये कतिपय दुर्घटना स्थलका स्थानीय छन् भने अरु केही सडकमा यात्रा गरिरहेका व्यक्ति पनि परेका छन् । इन्धन बोकेको ट्याङ्कर अर्को एउटा सवारी साधनसँग ठोक्किएपछि इन्धन पोखिएको थियो । पोखिएको सो इन्धन उठाएर लिने क्रममा स्थानीय व्यक्तिहरुबीच निकै भिडभाड भएको थियो ।

त्यस्तै यी दुई सवारी साधन ठोक्किएपछि त्यस समयमा सडकमा पनि मानिसहरू हिँडेका र केही भने आफ्नै सवारी साधनमा रहेका थिए । उनीहरू पनि सो दुर्घटनामा परेका थिए । उनीहरूलाई नै पछि आगोले छोएको थियो । आगलागी भएको र ठूलो मानवीय क्षति भएको प्रत्यक्षदर्शीले बताएका छन् । दुर्घटना लगत्तै घटनास्थलमा धेरै मानिस जलिरहेको देखिएको थियो भनेका छन् । घाइते र मृतकमध्ये धेरै दुर्घटनाका बेला घटनास्थलमा रहेका मोटरसाइकल चालक, पैदल यात्री, सडकका व्यापारीलगायत रहेको पनि उनीहरूले जनाएका छन् ।

इन्धन पोखिएको र त्यसपछि सोही इन्धनमा आगो सल्किएकाले आगोले नजिक रहेका मानिसहरू र सवारी साधन जलेका थिए । यहाँका राष्ट्रपति जुलियस मादा बायोले देशमा निकै ठूलो मानवीय क्षति भएको बताएका छन् । यस दुर्घटनाले आफूलाई अति दुखित बनाएको उनले बताएका छन् ।

प्रहरी अधिकारीहरूले १०८ जनाको शव शव गृहमा राखिएको बताएका छन् । ती सबै शवहरू जलेको अवस्थामा छन् ।