नायिका करिश्मा मानन्धर कक्षा १२ को परीक्षामा उत्तीर्ण भएकी छिन् । आज (शुक्रबार) कक्षा १२ को नतिजा प्रकाशन भएको थियो ।

नायिका मानन्धरले ‘ए प्लस’ ग्रेड ल्याएर परीक्षा उत्तीर्ण गरेकी हुन् । कक्षा १२ को परीक्षा गत भदौ ३० देखि असोज ८ गतेसम्म सञ्चालन भएको थियो । कोभिड–१९ को महामारीका कारण परीक्षाको तालिका सार्वजनिक गरेर पनि दुई पटक स्थगित भएको थियो । नायिका करिश्माले गोदावरीस्थित किटिनी कलेजबाट कक्षा १२ को परीक्षा दिएकी थिइन् ।

करिश्माको परीक्षा सेन्टर पनि सोही कलेजमै रहेको थियो । ‘ए प्लस’ ग्रेड ल्याएर परीक्षा उत्तीर्ण भएपछि करिश्माले खुसी हुँदै यही कलेजमा थप अध्ययन गर्ने बताइन् । १४ वर्षको उमेरमा फिल्म ‘सन्तान’ बाट अभिनयमा डेब्यु गरेकी करिश्मा सो समय ८ कक्षामा पढ्दै थिइन् । करिश्माको लक्ष्य भने आफ्नो नामको अगाडि डाक्टर लेखाउनु रहेको छ ।