बिग बास लिग (बीबीएल) टी-ट्वान्टी क्रिकेटमा सन्दीप लामिछाने आवद्ध टिम होबर्ट हुरिकेन्स विजयी भएको छ । आज (शुक्रबार) भएको खेलमा होबर्टले मेलबर्न स्टार्सलाई २४ रनले पराजित गरेको हो ।
अष्ट्रेलियाको होबर्टमा टस जितेर पहिले ब्याटिङ गरेको होबर्टले निर्धारित २० ओभरमा ६ विकेट गुमाउदै १८० रन बनाएको थियो । उसका लागि बेन म्याकडेरमोटले ६७ रनको अर्धशतकीय पारी खेले भने कप्तान म्याथ्यु वेडले ३९ रन बनाए । त्यस्तै डी आर्ची सर्टले २६ रन बनाई आउट भए भने टिम डेभिड २२ रनमा अविजित रहे । मेलबर्नका लागि आन्द्रे रसेलले ३ विकेट लिए भने नाथन कुल्टर नाइलको भागमा २ विकेट रह्यो ।
१८१ रनको लक्ष्य लिएर मैदान उत्रेको मेलबर्नले निर्धारित २० ओभरमा ९ विकेट गुमाउदै १५६ रन मात्र बनायो । मेलबर्नका लागि जोइ क्लार्कले ५२ रनको अर्धशतकीय पारी खेले पनि टोलीलाई जित दिलाउन सकेनन् । त्यस्तै हिल्टन कार्टराइट २६ रन बनाई आउट भए भने जोइ बर्न्सले २२ मार्कस स्टोनिसले १८ र कप्तान ग्लेन म्याक्सवेलले १२ रन जोडे ।
होबर्टका लागि टम रोजर्स र रिली मेरेडिथले समान ३-३ विकेट लिए भने नाथन एलिसको भागमा २ विकेट रह्यो । यस खेलमा सन्दीप भने विकेट विहीन रहे । ४ ओभरमा बलिङ्ग गरेका सन्दीपले ३२ रन खर्चिए । खेलको म्यान अफ दि म्याच नाथन एलिस भए । जितसँगै होबर्ट ५ खेलमा १० अंक जोड्दै तालिकाको तेस्रो स्थानमा उक्लिएको छ भने समान खेलमा ७ अंक जोडेको मेलबर्न सातौं स्थानमा रहेको छ ।
