बिग बास लिग (बीबीएल) टी-ट्वान्टी क्रिकेट अन्तर्गत बुधबार भएको खेलमा नेपाली लेग स्पिनर सन्दीप लामिछाने आवद्ध होबर्ट हुरिकेन्स विजयी भएको छ । हिजो भएको खेलमा होबर्टले मेलबर्न रेनेगेड्सलाई ८५ रनले पराजित गरेको हो ।

अष्ट्रेलियाको डकल्याण्ड स्टेडियम मेलबर्नमा टस हारेर पहिले ब्याटिङ गरेको होबर्टले निर्धारित २० ओभरमा ५ विकेट गुमाउदै २०६ रन बनाएको थियो । होबर्टका लागि बेन म्याकडेरमोटले १२७ रनको शतकीय पारी खेले भने टम डेभिड ३० रनमा अविजित रहे । रेनेगेड्सका लागि रेची टोप्लेले २ विकेट लिए ।

२०७ रनको लक्ष्य लिएर मैदान उत्रेको रेनेगेड्स १५ ओभर ५ बलमा १२१ रनमा समेटियो । रेनेगेड्सका साम हार्परले ५७ रनको अर्धशतकीय पारी खेले पनि टोलीलाई जित दिलाउन सकेनन् । होबर्टका लागि सन्दीप लामिछाने र टम रोजर्सले समान ३-३ विकेट लिए । सन्दीपले ३ ओभर ५ बलमा ३२ रन खर्चिएर ३ विकेट लिएका थिए ।

जितसँगै होबर्ट ७ खेलमा १७ अंक जोड्दै तालिकाको तेस्रो स्थानमा छ भने ६ खेलमा ५ अंक जोडेको रेनेगेड्स पुछारमा रहेको छ । खेलको म्यान अफ दि म्याच बेन म्याकडेरमोट भए । त्यसैगरी हिजो भएको पहिलो खेलमा सिड्नी सिक्सरले ब्रिसबेन हिट्सलाई २ विकेटले पराजित गरेको छ ।