नेपाली कांग्रेसका महामन्त्री गगन थापाले पार्टी सभापति शेरबहादुर देउवा पार्टीलाई एक ढिक्का बनाएर सञ्चालन गर्नमा चुक्न थालेको बताएका छन् । आज काठमाडौंमा भएको शेखर कोइराला समूहको समीक्षात्मक छलफलमा बोल्दै महामन्त्री थापाले सभापति देउवा आफूहरूको अपेक्षाविपरीत अघि बढेको बताए ।

देउवाले १४औँ महाधिवेशनबाट ४० प्रतिशत जनमत पाएको शेखर समूहलाई पाखा लगाउन थालेको उनको भनाइ छ । सम्बोधनका क्रममा महामन्त्री थापाले सभापति देउवाले पार्टीको विधि र विधानअनुरूप नचल्ने संकेत देखाएको बताए ।

थापाले कांग्रेसका लागि राष्ट्रिय सभाको निर्वाचनमा भएको सत्तारूढ दलहरूको गठबन्धन अन्तिम भएको पनि बताए । चुनावसम्म सत्ता गठबन्धन भएपनि चुनावमा भने कांग्रेस पार्टी एक्लै भिडेर देशको पहिलो पार्टी बनाउने उनको जिकिर छ ।