पेरिस सेन्ट जर्मेन (पीएसजी) फ्रेन्च कप फुटबलको अन्तिम १६ बाट बाहिरिएको छ । सोमबार राति भएको खेलमा साविक विजेता पीएसजी निससँग पेनाल्टी सुटआउटमा ६-५ ले पराजित हुँदै बाहिरिएको हो ।

पीएसजीको घरेलु मैदानमा भएको निकै प्रतिस्पर्धात्मक खेलको निर्धारित समय गोलरहित बराबरीमा सकिएपछि खेलको निर्णय पेनाल्टी सुटआउटमा गएको थियो । पीएसजीको लागि पेनाल्टीमा लियोनल मेस्सी, केलियन एमबाप्पे, जुलियन डाज्लर, मार्को भेराट्टी र जुवान बेर्नाटले गोल गर्दा, लिंड्रो पारेडेस र जाभी सिमोन्सले भने गोल गर्न असफल रहे । यता, निसका लागि मोर्गन, जिन क्लेयर,युसेफ अटल,एमिनी गोउइरी, इभान्स र डान्टेले गोल गरे भने एन्डी डेलोर्टले भने गोल गर्न सकेनन् ।

जितसँगै निस क्वाटरफाइनलमा प्रवेश गरेको छ भने पीएसजी प्रतियोगिताबाट बाहिरिएको छ । अब क्वाटरफाइनलमा निसले मार्सेलीसँग खेल्नेछ ।