बलिउड सुपरस्टार शाहरुख खान अन्तिम पटक सन् २०१८ मा फिल्म ‘जिरो’मा ठूलो पर्दामा देखिएका थिए । त्यसपछि उनलाई पर्दामा हेर्नका लागि फ्यानहरु लामो समयदेखि पर्खिरहेका थिए । अब शाहरुख फिल्म ‘पठान’ बाट कमब्याक गर्दैछन् । अहिले उनी यही फिल्मको सुटिङमा व्यस्त छन् ।

यसैबीच शाहरुख खानको एउटा तस्विर इन्टरनेटमा भाइरल भएको छ । यो तस्विरमा किंग खानको नयाँ लुक देखिएको छ । तस्विरमा शाहरुखले कालो टक्सिडो लगाएको देखिन्छ । उनी लामो कपाल र साल्ट र पेपर दाह्रीमा निकै ड्यासिङ देखिएका छन् । यो तस्विर सार्वजनिक भएदेखि नै अभिनेताको अर्को फिल्म ‘पठान’ मा उनको लुक हुनसक्ने अनुमान मानिसहरूले गरिरहेका छन् । तर, यसमा कुनै सत्यता छैन । वास्तवमा यो एक सम्पादन तस्विर हो । शाहरुख खानको यो तस्विर सन् २०१७ मा सेलिब्रेटी फोटोग्राफर डब्बू रतनानीको फोटोसुटको हो ।

डब्बू रतनानीले आफ्नो सामाजिक सञ्जाल अकाउन्टमा शाहरुखको वास्तविक तस्विर सेयर गरेका हुन् । जसमा शाहरुख खान क्लिन सेभमा देखिएका छन् । यो तस्विर सेयर गर्दै उनले लेखेका छन्, ‘Be Yourself, Because An Original Is Worth More Than A Copy ‘ वर्कफ्रन्टको कुरा गर्ने हो भने शाहरुख खान अहिले आफ्नो फिल्म ‘पठान’ को सुटिङमा व्यस्त छन् । यो फिल्ममा उनी दिपिका पादुकोणको साथमा देखिनेछन् ।