एसएस राजामौलीको फिल्म ‘आरआरआर’ रिलिज भएको छ । यो ठूलो बजेटको फिल्मको फ्यानहरुले लामो समयदेखि प्रतिक्षा गरेका थिए । जुनियर एनटीआर र रामचरणको फिल्ममा बलिउड स्टार अजय देवगन र आलिया भट्ट पनि महत्त्वपूर्ण भूमिकामा छन्।

फिल्ममा अजय देवगन र आलिया भट्टको भूमिका सानो भए पनि उनीहरुले मोटो पारिश्रमिक लिएका छन् । रिपोर्टका अनुसार अजय देवगनले फिल्मको आफ्नो भागको सुटिङ मात्र ७ दिनमा पूरा गरेका छन् । यसैबीच, आलियाको सिन करिब १० मिनेटको रहेको छ ।

रिपोर्टका अनुसार आलिया भट्टले सानो भूमिकाको बदलामा ९ करोड भारु पाएकी छिन् । बलिउड फिल्ममा काम गरेबापत आलियाले यो रकम पाउँछन् । अर्थात्, आलियालाई मुख्य भूमिकामा भएजस्तै पारिश्रमिक दिइएको छ । अजय देवगनले ३५ करोड पाएका छन् । अजयले पनि फिल्मका लागि करिब त्यति नै रकम लिने गर्छन् । अर्थात्, शुल्कको मामिलामा, राजामौलीले यी बलिउड कलाकारहरूलाई निराश गरेका छैनन्।

योसँगै फिल्ममा ओलिभिया मोरिस, समुथिराकनी, रे स्टिभेन्सन र एलिसन डोडी जस्ता कलाकार पनि देखिएका छन् । सबैले आफ्नो उत्कृष्ट अभिनयले दर्शकको मन जितेका छन् । फिल्म ‘आरआरआर’ ले पहिलो दिनमै बक्स अफिसमा कीर्तिमान बनाएर विश्वभर २२३ करोड कलेक्सन गरेको छ । यसरी आरआरआर भारतीय सिनेमाको नम्बर एक ओपनर बनेको छ । यसले ‘बाहुबली २’ लाई पनि उछिनेको छ । अर्थात् राजामौलीले आफ्नै कीर्तिमान समेत तोडेका छन् ।