नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले राजनैतिक उपलब्धिको रक्षा गर्न र प्रतिगमनका विरुद्धमा पाँच दलको गठबन्धन बनेको बताएका छन् । बिहीबार माओवादी केन्द्रद्वारा कैलालीको गौरीगङ्गामा आयोजित आमसभामा उनले यस्तो बताएका हुन् ।

पूर्वप्रधानमन्त्री तथा अध्यक्ष दाहालले संविधान, समावेशी लोकतान्त्रिक गणतन्त्र, राष्ट्रिय स्वाधीनता तथा अस्मिताको रक्षा गर्दै प्रतिगमनलाई परास्त गर्न पाँच दलको गठबन्धन गरिएको स्पष्ट पारे । निर्वाचनको मुखमा गठबन्धन टुट्छ र फेरि प्रतिगमनमा जान पाइन्छ भन्ने षड्यन्त्र भएको उनले बताए ।

‘बुधबार साँझसम्म गठबन्धन टुटाउन षड्यन्त्र भएको थियो’, प्रचण्डले भने, ‘छ वटै महानगर र ११ वटै उपमहानगरपालिकामा सर्वसम्मत ढङ्गले तालमेल गर्ने निर्णय हुँदा प्रतिगमनकारी विक्षिप्त भएका छन् । मनस्थिति खलबलिएको छ ।’ आमसभामा सो पार्टीका सुदूरपश्चिम प्रदेशका इन्चार्ज खगराज भट्टलगायत वक्ताले पनि समसामयिक राजनीतिका विषयमा बोलेका थिए । सभामा जनता समाजवादी पार्टीबाट नेकपा माओवादी केन्द्रमा प्रवेश गर्ने नेता नेता कार्यकर्तालाई अध्यक्ष प्रचण्डले स्वागत गरेका थिए । सो अवसरमा जनता समाजवादी पार्टीका नेता कृष्णकुमार चौधरीको नेतृत्वमा नेता कार्यकर्ता माओवादीमा प्रवेश गरेका हुन् ।