सत्ता गठबन्धनबाट काठमाडौं महानगरपलिकाकी मेयर उम्मेदवार सिर्जना सिंहले आफूले मेयर पदमा जित हासिल गरे काठमाडौं महानगरलाई महान घर बनाउने बताएकी छन् । आज (शुक्रबार) सत्ता गठबन्धनले शान्ति बाटिकामा आयोजना गरेको संयुक्त आमसभामा सम्बोधन गर्दै उनले यस्तो बताएकी हुन् ।

सिंहले मतदाताको शीर निहुरिन नदिने प्रतिबद्धता जनाएकी छन् । उनले भनिन्, ‘महानगरलाई महान घर बनाउने छु । म काठमाडौंलाई ‘महाघर’ जस्तो गरेर चलाउँछु । ‘कहिले पनि मतदाताको शीर निहुरिन दिन्नँ ।’

महिला आन्दोलनका लागि आफ्नो उम्मेदवारी गौरवपूर्ण रहेको भन्दै सिंहले काठमाडौं महानगरलाई भ्रष्टाचारमुक्त बनाउने, सुशासन कार्यम गर्ने , महिलालाई सीपमुलक तालिम दिएर आत्मनिर्भर बनाउने, विदुर पुरुषका लागि पनि विशेष राहत प्याकेज ल्याउने, सामुदायिक विद्यालयको अवस्था सुधार गर्ने, सम्पदा संरक्षण गर्ने, हरियाली बढाउने लगायतका एजेन्डा रहेको बताइन् । त्यस्तै उनले मेयर पदमा जिते काठमाडौंमा निःशुल्क खानेपानी र शौचालयको व्यवस्था गर्ने पनि बताइन् ।