काठमाडौँ मेयरमा स्वतन्त्र उम्मेदवार बालेन साह र उपमेयरमा नेकपा एमालेकी सुनिता डंगोलको अग्रता कायमै रहेको छ । राष्ट्रियसभा गृहमा भइरहेको मतगणनामा अहिलेसम्मकाे मतपरिणामअनुसार स्वतन्त्र उम्मेदवार साह १९ हजारभन्दा बढी मत अन्तरले अगाडी रहेका छन् भने सुनिता २७ हजार भन्दा बढी मत अन्तरले अघि रहेकी छिन् ।

साहले ५० हजार ३० मत ल्याएका हुन् । त्यस्तै गठबन्धनबाट नेपाली कांग्रेसकी उम्मेदवार सिर्जना सिंहले ३० हजार ७६७ मत पाउँदा नेकपा एमालेका उम्मेदवार केशव स्थापितले ३० हजार १५ मत पाएका छन् । केशव सिर्जना भन्दा ७५२ मतले पछि रहेका हुन् । बालेन साह कांग्रेसकी सिर्जनाभन्दा १९,२६३ मतले र एमालेका स्थापित भन्दा २०,०१५ मत अन्तरले अगाडि रहेका छन् ।

त्यसैगरी काठमाडौं महानगरपालिकाको उपमेयरमा नेकपा एमालेकी उम्मेदवार सुनिता डंगोलले अग्रता लिएकी छिन् । सुनिताले ४३,६४७ मत ल्याएकी छिन् । त्यस्तै गठबन्धनबाट नेकपा एकीकृत समाजवादीका उम्मेदवार रामेश्वर श्रेष्ठले १६,२८२ मत पाएका छन् भने राप्रपाकी उम्मेदवार विनिता मगैयाले ८,६६१ मत पाएकी छन् । सुनिता एकीकृत समाजवादीका रामेश्वर भन्दा २७,३६५ र राप्रपाकी विनिता भन्दा ३४,९८६ मत अन्तरले अघि रहेकी छिन् ।

काठमाडौँ महानगरपालिकामा १ लाख ९१ हजार ५५ मत खसेको थियो । अहिलेसम्म करिब १ लाख ५३ हजार मत गणना भइसकेको छ भने ३७ हजार ७ सयजति मत गन्न बाँकी रहेको छ । अहिले वडा नम्बर १३, १४, १५, १६, १८, १९, २० र २१ को मत गणना भइरहेको छ भने वडा नम्बर १७ को मतगणना सुरु हुनै बाँकी रहेको छ ।