आयरल्याण्ड भ्रमणमा रहेको भारतीय क्रिकेट टिम पहिलो टी-ट्वान्टी खेलमा विजयी भएको छ । आइतबार राति भएको खेलमा घरेलु टोली आयरल्याण्ड भारतसँग ७ विकेटले पराजित भएको हो ।

वर्षाको कारण खेल १२ ओभरमा झारिएको थियो । डब्लिनमा भएको खेलमा टस हारेर पहिले ब्याटिंग गरेको आयरल्याण्डले निर्धारित १२ ओभरमा ४ विकेट गुमाउँदै १०८ रन बनाएको थियो । आयरल्याण्डका ह्यारी टेक्टरले ६४ रनको अर्धशतकीय पारी खेले भने लोर्कान टुकरले १८ रन बनाए । भारतका लागि भुवनेश्वर कुमार, हार्दिक पाण्डय, आभेस खानर र युजभेन्द्र चाहालले समान १-१ विकेट लिए ।

१०९ रनको लक्ष्य लिएर मैदान उत्रेको भारतले ९ ओभर २ बलमा ३ विकेट गुमाउँदै पूरा गर्यो । भारतको लागि दीपक हुडाले अविजित रहँदै ४७ रन बनाए भने इशान किशनले २६ रन जोड्दा कप्तान हार्दिक पाण्डयले २४ रन बनाए । आयरल्याण्डका लागि क्रेग योङले २ विकेट लिए भने जोस लिटलको भागमा १ विकेट रह्यो । जितसँगै भारतले दुई खेलको सिरिजमा १-० को अग्रता लिएको छ ।