पाल्पामा बस दुर्घटना हुँदा ६ जनाको मृत्यु भएको छ भने १८ जना घाइते भएका छन् । गएराती पश्चिम पाल्पाको रैनादेवी छहरा गाउँपालिका वडा नं. ८ टाडीस्थित सालझण्डी ढोरपाटन सडक खण्डमा बस दुर्घटना भएको हो ।

रुपन्देहीको सालझण्डीबाट पाल्पाको खुर्सानेतर्फ आउँदै गरेको ग १ ख ४९७७ नम्बरको बस हुँदा खुर्साने गाउँका ६ जनाको घटनास्थलमै मृत्यु भएको हो । मृत्यु हुनेमा सबै महिला रहेको प्रहरीले जनाएको छ । मृत्यु हुनेमा रैनादेवी छहरा–८ की ३६ वर्षीया निर्मला घिमिरे, उनकी ११ वर्षीया छोरी सरुमाया घिमिरे, ५४ वर्षीया खेमकुमारी राना, ४० वर्षीया गुनाकुमारी गाहा, २१ वर्षीया दानकुमारी खत्री र १९ वर्षीया विमा पाण्डे रहेका छन् ।

त्यस्तै दुर्घटनामा परी १८ जना घाइते भएका छन् । घाइतेलाई रुपन्देहीतर्फ उपचारका लागि पठाइएको प्रहरीले जनाएको छ । घाइते मध्ये ६ जनाको एडमनसिटी हस्पिटल जितगढी बुटवल र १२ जनाको लुम्बिनी प्रादेशिक अस्पताल बुटवलमा उपचार भइरहेको छ ।

बस सडकबाट करिब ६० मिटर तल भिरमा खसेको छ । दुर्घटनाको कारण खुल्न नसकेको प्रहरीले जनाएको छ । दुर्घटनाको विषयमा थप अनुसन्धान भइरहेको प्रहरीले जनाएको छ ।