नवकान्तिपुर संवाददाता
काठमाडौं, ३० पुस ।
पछिल्लो चौबीस घण्टामा नेपालमा ५ जनामा कोरोना भाइरसको संक्रमण पुष्टि भएको छ भने कसैको पनि मृत्यु भएको छैन । स्वास्थ्य तथा जनसंख्या मन्त्रालयका अनुसार देशभरका विभिन्न प्रयोगशालामा १ हजार २२९ जनाको नमूना परीक्षण गरिएको थियो । जसमा ५४६ जनाको पीसीआर परीक्षण गर्दा ५ जना र ६८३ जनाको एन्टिजेन परीक्षण गर्दा कसैमा पनि कोरोना पुष्टि भएको छैन ।
त्यस्तै, चौबीस घण्टामा कोरोनाका कारण कसैको पनि मृत्यु भएको छैन । नेपालमा हाल मृत्यु हुनेको संख्या १२ हजार २० पुगेको मन्त्रालयले जनाएको छ । यस्तै आज ४ जना कोरोना संक्रमित निको भई डिस्चार्ज भएका छन् । योसँगै हालसम्म निको हुनेको संख्या ९ लाख ८९ हजार २ जना पुगेको छ ।
नेपालमा हाल सक्रिय संक्रमितको संख्या २९ रहेको छ । यससँगै देशभर कोरोना संक्रमितको कुल संख्या पीसीआर विधिबाट १० लाख १ हजार ५१ र एन्टिजेन विधिबाट १ लाख ५२ हजार २१७ जना पुगेको छ ।
