देशका विभिन्न स्थानबाट मृत अवस्थामा ४ जना फेला परेका छन् । काभ्रेपलाञ्चोक, पनौती नगरपालिका-५ चौकोट डेरा गरी बस्ने भक्तपुर चाँगुनारायण नगरपालिका-६ नगरकोट घर भएकी ३८ बर्षीया मनिता थामी आफ्नै कोठामा शुक्रबार मृत अवस्थामा फेला परेकी छिन् ।

त्यस्तै ताप्लेजुङ, फुङलिङ नगरपालिका-८ दोखु काभ्रे बस्ने ५३ वर्षीय कमल राई आफ्नै घरमा शनिबार मृत अवस्थामा फेला परेका छन् । यता झापा, बाह्रदशी गाउँपालिका-५ घोडामारास्थित बाटोमा बिर्तामोड नगरपालिका-२ बस्ने २५ वर्षीय सुनिल मुर्मु शनिबार मृत अवस्थामा फेला परेका छन् ।

यस्तै डडेल्धुरा, डडेल्धुरा आलिताल गाउँपालिका-८ डाँडाखर्क बस्ने गजेन्द्र बोहराको छोरा ८ वर्षीय भरत बोहरा सोही ठाउँस्थित खेतमा शनिबार मृत अवस्थामा फेला परेका छन् । पुस १३ गते बिहानदेखि घरबाट हराई बेपत्ता भएका उनको खोजी गर्ने क्रममा खेतको खाल्डोमा पुरेको अवस्थामा शव फेला परेको हो । घटनाबारे सोधपुछ तथा अनुसन्धानको लागि प्रहरीले २ जनालाई नियन्त्रणमा लिएको छ । यस सम्बन्धमा प्रहरीले आवश्यक अनुसन्धान गरिरहेको छ ।