देशका विभिन्न स्थानबाट मृत अवस्थामा ६ जना फेला परेका छन् । काठमाडौं, चन्द्रागिरी नगरपालिका-२ नागढुङ्गास्थित खोल्साको झाडीमा रुपन्देही ओमसतिया गाउँपालिका-२ बस्ने ४० वर्षीय ईन्द्र बहादुर गन्दर्भ बुधबार मृत अवस्थामा फेला परेका छन् ।

त्यस्तै गुल्मी, मालिका गाउँपालिका-८ नमता बस्ने ६६ वर्षीया तारा खत्री आफ्नै भान्सा कोठामा बुधबार मृत अवस्थामा फेला परेकी छिन् । यता कैलाली, टिकापुर नगरपालिका-२ सन्कट्टि घाटस्थित कर्णाली नदीमा हाल नाम, थर, वतन नखुलेका अन्दाजी ६० वर्षीय पुरुष बुधबार मृत अवस्थामा फेला परेका छन् ।

यस्तै मोरङ, सुन्दरहरैचा नगरपालिका-६ दिपु टोल बस्ने कृष्ण बहादुर दमाईको घरमा बिगत ३ वर्षदेखि बस्दै आएका ७९ वर्षीय टेक नाथ खतिवडा आफ्नै ओछ्यानमा बुधबार मृत अवस्थामा फेला परेका छन् । यसैगरी चितवन, कालिका नगरपालिका-८ न्युरेनी बस्ने ६० वर्षीय जित बहादुर दर्लामी मगरको घरमा कालिकोट सान्नि त्रिवेणी गाउँपालिका-५ घर बताउने ४० वर्षीया देवी पन्त नाम बताउने महिला बुधबार मृत अवस्थामा फेला परेकी छिन् ।

यता रूपन्देही, ओमसतिया गाउँपालिका-४ रोहिणी पुल नजिकै टुलटेक्स भवनको गल्लीमा सोही गाउँपालिका-४ बस्ने ३० वर्षीय विरेन्द्र मुसहर बुधबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।